Ffeilio Electronig

Mae'r canllawiau canlynol yn amlinellu'r drefn ar gyfer proses ffeilio yn Adran Sifil y Llys Apêl drwy ebost yn unol â pharagraff 15.1.A(2) y Cyfarwyddyd Ymarfer i Ran 52 Rheolau Trefniadaeth Sifil.

Lle bo'r mater dan sylw'n destun brys, dylai'r sawl sy'n ceisio ffeilio wneud hynny cyn gynted ag y bo modd yn ystod y dydd a dylai ffonio Cofrestrfa'r Swyddfa Apeliadau Sifil i roi gwybod iddynt.  Y rhif ffôn yw 020 7947 6409.

Nid yw derbyn y dogfennau hyn yn golygu o reidrwydd (a) fod y Llys yn derbyn awdurdodaeth na (b) bod y dogfennau o reidrwydd yn cydymffurfio â gofynion y Llys.

Cewch wybod am unrhyw ddiffygion a welir, ond eich cyfrifoldeb chi o hyd, ac nid cyfrifoldeb y Swyddfa Apeliadau Sifil, fydd sicrhau bod unrhyw ddogfennau a gaiff eu ffeilio mewn trefn ac yn cydymffurfio â'r terfynau amser sydd wedi'u rhagnodi.

Canllawiau

Canllawiau ar gyfer ffeilio Rhybuddion Apelwyr, Rhybuddion Atebwyr a Rhybuddion Cyflwyno Cais drwy ebost

1. Dyma'r canllawiau y cyfeirir atynt ym mharagraff 15.1A(2) y Cyfarwyddyd Ymarfer i Ran 52 Rheolau Trefniadaeth Sifil.
2. Nid yw'r gwasanaeth hwn ond ar gael i barti sydd wedi'i gynrychioli gan gwmni cyfreithwyr.
3. Gall parti sydd eisiau ffeilio Rhybudd Apelydd, Rhybudd Atebydd neu Rybudd Cyflwyno Cais (gyda'i gilydd, “Rhybudd”) drwy ebost wneud hynny (yn amodol ar y cyfyngiadau a geir yn y canllawiau hyn) drwy ebostio'r dogfennau i gofrestrfa'r Swyddfa Apeliadau Sifil, gan ddefnyddio'r cyfeiriad hwn:

   civilappeals.registry@hmcourts-service.gsi.gov.uk.

   Edrychir ddwy waith y dydd ym mlwch derbyn y cyfeiriad hwn. Bydd negeseuon ebost a ddaw i mewn cyn 10:00am yn cael sylw pan fydd cofrestrfa'r Swyddfa Apeliadau Sifil yn agor am fusnes y diwrnod hwnnw.  Bydd negeseuon a ddaw i mewn ar ôl 4:30pm yn gorfod aros tan y diwrnod gwaith nesaf am sylw.

4. Pan gaiff Rhybudd ei ffeilio drwy ebost, rhaid i'r ebost gynnwys:
   
   (a) enw'r anfonwr, ynghyd â chadarnhad fod yr anfonwr wedi'i awdurdodi i roi ymgymeriadau ar ran y cwmni cyfreithwyr dan sylw; a
   
   (b) ymgymeriad gan y cwmni cyfreithwyr sy'n cynrychioli'r parti i dalu'r tâl gofynnol cyn gynted ag y bo'n ymarferol, a beth bynnag o fewn 7 diwrnod i ddyddiad anfon yr ebost.
   Os na chydymffurfir â'r ymgymeriad, gall y cais gael ei wrthod yn awtomatig. Gall y Llys gyfarwyddo hefyd y dylid adrodd am dor-ymgymeriad i Gymdeithas y Gyfraith.

5. Ni chaiff Rhybudd fydd wedi'i ffeilio drwy ebost ei dderbyn:
   
   (a) os na chydymffurfir â'r gofynion a amlinellir ym mharagraffau 2 i 4 uchod;
   
   (b) os bydd unrhyw atodiad mewn fformat gwahanol i Microsoft Word neu Adobe Acrobat (.pdf); neu
   
   (c) os bydd y ddogfen yn fwy nag 20 tudalen o ran hyd, 2 megabeit o ran maint ffeil, neu os yw'n cynnwys deunydd lliw.

6. Caiff Rhybudd fydd wedi'i ffeilio drwy ebost:
   
   (a) ei dderbyn fel un a ffeiliwyd ar y dyddiad derbyn os caiff ei dderbyn erbyn 4:30pm;
   
   (b) ei drin fel un a ffeiliwyd ar y diwrnod gwaith nesaf os caiff ei dderbyn wedi 4:30pm.

7. Ni roddir blaenoriaeth i ohebiaeth ebost dros ddeunydd a dderbynnir drwy'r post neu ffacs.