Fideo-gynadledda yn Adran Sifil y Llys Apêl
Cyfleusterau ar gael i wrando achosion o bell drwy gyswllt fideo
Y System
Mae gan Adran Sifil y Llys Apêl gamerâu a sgriniau symudol y mae modd eu gosod yn y rhan fwyaf o'i hystafelloedd llys. Mae'r rhain yn caniatáu i'r Barnwyr a'r cyfreithwyr weld a siarad â phartïon mewn canolfannau pell. Fel arfer bydd gofyn i ymgyfreithwyr nad ydynt yn cael eu cynrychioli ddefnyddio canolfan bell sydd wedi'i lleoli yn eu Llys lleol, ond efallai y bydd gan dwrneiod eu cyfleusterau fideo-gynadledda eu hunain.
Mae'r cyfarpar yn ystafell y llys yn cael ei reoli gan glerc sy'n symud o gamera i gamera ac yn sicrhau bod pob parti dan sylw yn gallu gweld pwy bynnag sy'n siarad ar unrhyw adeg.
Achosion sy'n Addas ar gyfer Fideo-gynadledda
- Achosion lle gellir sicrhau arbedion yn y costau
- Achosion lle gellir osgoi aflonyddwch cyhoeddus
- Achosion lle gellir hwyluso rhestru cynnar
- Achosion sy'n cynnwys partïon bregus megis cleifion ysbyty neu blant
- Achosion sy'n cynnwys partïon sydd dramor
- Achosion sy'n cynnwys carcharorion
- Achosion brys lle nad yw'n hawdd i'r partïon ddod i'r llys
Y Drefn er mwyn Gwneud Cais am Fideo-gynadledda
Rhaid i'r Llys gael caniatâd i wrando achos drwy fideo-gynadledda. Dylai partïon gysylltu â'r Swyddfa Restru Apeliadau Sifil yn gyntaf. Dylent wneud yn siŵr fod cyfarpar fideo-gynadledda ar gael ar gyfer diwrnod neu ddiwrnodau eu gwrandawiad.
Wedyn dylid gwneud cais ysgrifenedig i'r Swyddfa Restru. Caiff hwn ei gyfeirio at y Barnwr Llywyddol sydd i fod i wrando'r achos, neu at Arglwydd/Arglwyddes Ustus Goruchwylio'r achos os nad oes gwrandawiad wedi cael ei ddyrannu eto.
Os bydd pob parti i'r achos yn cytuno i fideo-gynadledda bydd y cais ysgrifenedig yn ddigonol. Os bydd unrhyw barti yn gwrthwynebu fideo-gynadledda, efallai y bydd yn rhaid cynnal gwrandawiad byr.
Y Drefn er mwyn Trefnu Fideo-gynadledda
Unwaith y bydd y Llys wedi cyfarwyddo y dylai achos gael ei wrando drwy fideo-gynadledda, cyfrifoldeb y parti sydd wedi gofyn am fideo-gynadledda yw ei drefnu.
Cyfrifoldeb y parti sy'n trefnu'r cyfleusterau fydd holl gostau'r trawsyrru, yn cynnwys llogi'r cyfarpar a chostau'r rhai sy'n ei weithredu mewn safleoedd pell, yn y lle cyntaf. Dylid gwneud pob ymdrech resymol i gadw'r costau i lawr.
Bydd partïon sy'n defnyddio cyfleusterau yn eu llys lleol hefyd yn gyfrifol yn y lle cyntaf am dalu costau'r trawsyrru, a'r gyfradd a godir fydd £21.60 yr hanner awr.
Bydd pob cost o'r fath yn rhan o gostau'r achos a bydd y Llys yn gorchymyn pa bartïon ddylai eu talu ac ym mha gyfrannau.
Bydd Adran Sifil y Llys Apêl yn eistedd mewn ystafell llys yn y Llysoedd Barn Brenhinol, a dyma fydd y safle lleol at ddibenion fideo-gynadledda. Rhaid i'r parti sy'n gyfrifol am drefnu'r fideo-gynhadledd gysylltu â'r Swyddfa Restru Apeliadau Sifil yn y mannau cyswllt uchod a gwneud trefniadau trawsyrru. Bydd angen y wybodaeth dechnegol ganlynol ar y Swyddfa Restru:
- Cyfeiriad y safle pell
- Manylion y cyfarpar fideo-gynadledda o bell yn cynnwys rhif llinellau ISDN a'r cyflymder cysylltu
- Enwau cyswllt a rhifau ffôn ar y safle pell
Bydd angen bodloni'r Llys fod y cyfarpar ar y safle pell yn briodol. Rhaid i'r cyfarpar sydd ar gael yn y lleoliad pell gyfateb i chwe llinell ffôn o leiaf.
Rhaid i'r sawl sy'n trefnu'r fideo-gynhadledd sicrhau bod gweithredwr ar gael ar y safle pell drwy gydol y gwrandawiad i ddelio ag agweddau technegol.
Mae dewis fideo-gynhadledd yn golygu nad oes modd cyflwyno na newid dogfennau ar y funud olaf. Cyfrifoldeb y partïon neu eu cynrychiolwyr yw gwneud y cyfryw gyflwyniadau neu newidiadau mewn da bryd cyn y gwrandawiad.
Y Drefn yn y Gwrandawiad
- Bydd y Barnwr Llywyddol yn penderfynu ymlaen llaw a fydd gwisg llys ffurfiol yn briodol mewn achosion fideo-gynadledda. Efallai y bydd mewn achosion sydd wedi'u lleoli mewn ystafell llys ond nid pan fydd y safle pell yn rhywle ar wahân i ystafell llys.
- Dylai'r partïon gyrraedd canolfannau fideo-gynadledda 20 munud cyn y mae'r gwrandawiad i fod i ddechrau.
- Ar y safle pell rhaid i'r parti sy'n gyfrifol am drefnu'r fideo-gynhadledd wneud yn siŵr fod yna ddigon o feicroffonau a bod y camerâu yn gallu dangos y partïon perthnasol i gyd.
- Dylai defnyddwyr fod yn ymwybodol mai dim ond y meicroffon sy'n agos at y rhai sydd yn y llun fydd ymlaen, felly dim ond y partïon yn y llun fydd yn cael eu clywed yn iawn.
- Y Barnwr Llywyddol fydd yn penderfynu ar y drefn ar gyfer y fideo-gynhadledd. Ni fydd y Barnwr/Barnwyr yn dod i mewn i'r llys fel arfer nes bydd y ddau safle ar-lein. Bydd y Barnwr/Barnwyr yn gadael y llys fel arfer tra bydd y ddau safle yn dal i fod ar-lein. Bydd y Barnwr Llywyddol yn sicrhau bod y rhai sy'n ymwneud â'r achos yn ymwybodol o ba bartïon sydd yn y ddau leoliad. Efallai y bydd ef neu hi am roi cyfarwyddiadau ynglŷn â'r trefniadau eistedd a sicrhau bod modd gweld a chlywed pob parti yn iawn.
- Fel arfer bydd Cymdeithasydd neu Dywysydd yn bresennol i weithio'r cyfarpar recordio yn ystafell y llys yn y Llysoedd Barn Brenhinol. Mae'r fideo-gynhadledd yn achos Llys ac ni chaniateir gwneud unrhyw recordiad ohono ar wahân i'r fersiwn swyddogol. Ni chaiff unrhyw barti recordio delweddau na seiniau o'r lleoliad pell. At ddibenion fideo-gynadledda mae'r lleoliad pell yn ystafell llys ac mae'r rheolau arferol mewn grym.
Atodiad Technegol
- Mae'r cyfarpar fideo-gynadledda sy'n cael ei ddarparu ar gyfer Adran Sifil y Llys Apêl yn gallu rhedeg ar gyflymder uchaf o 512kbps, sy'n cyfateb i wyth llinell ISDN (ddigidol), gan ddarparu llun fideo o ansawdd uchel.
- Mae dau gamera, y naill a'r llall wedi'i leoli ar ben sgrin blasma NEC 42. Bydd y sgriniau a'r camerâu yn cael eu lleoli yn ystafell y llys yn y fath fodd fel bod y farnwriaeth a'r eiriolwyr yn gallu gweld a siarad â'r tystion yn y pen pellaf. Clerc y Llys fydd yn rheoli gweithrediad y camerâu a bydd yn gallu newid yn ôl ac ymlaen rhwng y camerâu fel bod y tyst yn gallu gweld pwy bynnag sy'n siarad ag ef neu â hi ar y pryd.
- Mae'r unedau fideo-gynadledda yn gwbl symudol: mae'r sgriniau plasma a'r camerâu ar droli gref, sy'n golygu bod modd symud y cyfarpar yn gyflym ac yn hawdd.
Ar gyfer Fideo-gynadledda mewn Achosion Sifil, cysylltwch os gwelwch yn dda â'r Swyddfa Restru Apeliadau Sifil.
Rhagor o wybodaeth
Arweiniad yw'r wybodaeth hon i bartïon sy'n ystyried defnyddio fideo-gynadledda mewn achos o dan yr Adran Sifil yn y Llys Apêl. Mae manylion llawn y drefn fideo-gynadledda i'w gweld hefyd yn y Cyfarwyddyd Ymarfer at y Rheolau Trefn Sifil Rhan 32.