Cynnal chwiliad sefydlog
A roddir grant mewn perthynas â phob ystâd?
Sut ydw i'n trefnu chwiliad sefydlog?
Beth os nad wyf yn derbyn copi o grant drwy'r post?
Beth ddylwn i ei wneud os gwelaf fy mod wedi rhoi'r manylion anghywir?
Alla' i adnewyddu fy chwiliad sefydlog?
Beth yw oriau agor y Cofrestrfeydd Profiant?
Rwyf eisiau chwiliad cyffredinol yn hytrach na chwiliad sefydlog, beth ddylwn i ei wneud?
I'r rhan fwyaf o ddibenion, mae chwiliad cyffredinol yn fwy addas na chwiliad sefydlog. Fodd bynnag, gall chwiliad sefydlog fod yn ddefnyddiol yn yr amgylchiadau canlynol:
- Os ydych eisoes wedi gwneud chwiliad cyffredinol a ddangosodd na roddwyd grant cynrychiolaeth, ond eich bod o'r farn y rhoddir grant yn y chwe mis nesaf.
- Os yw dyddiad y farwolaeth yn ddiweddar
- Os ydych angen gwybod fod grant wedi'i roddi e.e. os ydych yn bwriadu gwneud cais yn erbyn yr ystâd
Mae dwy swyddogaeth i chwiliad sefydlog:
- Mae'r cais i chwilio'n parhau mewn grym am chwe mis. Gwneir chwiliad parhaus am gyfnod o chwe mis o'r dyddiad pryd y trefnwyd chwiliad sefydlog (h.y. y dyddiad y cychwynnodd y chwiliad). Pe rhoddir grant cynrychiolaeth o fewn y cyfnod hwnnw, bydd yr ymgeisydd (h.y. y person sydd wedi trefnu'r chwiliad sefydlog) yn derbyn copi o'r grant drwy'r post yn awtomatig
- Gwneir chwiliad o'r grantiau cynrychiolaeth a gyhoeddwyd yn ystod y deuddeng mis cyn i'r chwiliad sefydlog gael ei drefnu. Os rhoddwyd grant yn ystod y cyfnod hwnnw o ddeuddeng mis, anfonir copi ohono drwy'r post i chi. Nodwch, os gwelwch yn dda, na chwilir cofnodion grantiau a roddwyd dros 12 mis yn ôl. Mae'r chwiliad yn berthnasol i Gymru a Lloegr yn unig (mae gan yr Alban ei hawdurdodaeth ei hun)
Mae chwiliad sefydlog yn rhoi hawl i chi gael copi o'r grant cynrychiolaeth a'r ewyllys (os oes un). Os ydych eisiau cynnal chwiliad cyffredinol yn hytrach na chwiliad sefydlog, rhoddir manylion yn ddiweddarach yn y ffurflen hon.
Grant cynrychiolaeth yw dogfen a roddir gan yr Uchel Lys i ysgutorion neu weinyddwyr ystâd sy'n rhoi awdurdod iddynt gasglu a gweinyddu'r ystâd. Ceir tri phrif fath o grant:
- Profiant - a ganiateir i'r ysgutorion a enwir yn yr ewyllys
- Llythyrau Gweinyddu gydag Ewyllys wedi'i Hatodi - a ganiateir i rywun ar wahân i ysgutor pan adawyd ewyllys gan yr ymadawedig
- Llythyrau Gweinyddu a ganiateir pan na fu i'r ymadawedig adael ewyllys
Mae'r grant yn darparu enwau ysgutorion neu weinyddwyr, amcangyfrif o faint yr ystâd ac os bydd cwmni o dwrneiod wedi cymryd y grant, bydd yn rhoi enw a chyfeiriad y cwmni i chi. Drwy'r ffurflen hon, defnyddir y gair "grant". Mae hwn yn cyfeirio at bob math o grant cynrychiolaeth
A roddir grant mewn perthynas â phob ystâd?
Na. Mewn rhai achosion caiff yr ysgutorion neu'r gweinyddwyr ryddhau'r holl asedion yn yr ystâd heb fod angen iddynt gael grant cynrychiolaeth. Mae hyn yn berthnasol i'r rhan fwyaf o ystadau bychain (h.y. lle bo'r ymadawedig wedi gadael llai na £5000) ac yn aml i ystadau lle'r oedd yr holl asedau ym meddiant enwau ar y cyd. Os na roddwyd grant, nid oes gennym unrhyw fanylion am yr ystâd honno ac felly nid oes modd i ni roi unrhyw fanylion i chi.
Sut ydw i'n trefnu chwiliad sefydlog?
Er mwyn trefnu chwiliad sefydlog rhaid i chi lenwi ffurflen chwiliad sefydlog. Mae modd i chi gael ffurflen o unrhyw Gofrestrfa Brofiant Ddosbarth, Is-Gofrestrfa Ddosbarth, neu'r Brif Gofrestrfa. Os ydych chi'n dwrnai, mae manylion am y ffurflen chwiliad sefydlog ar gael yn y Tristram and Cootes cyfredol, sef "Probate Practice". Rhaid i chi gwblhau'r holl fanylion y gofynnir amdanynt ar y ffurflen:
Enwau llawn yr ymadawedig (enwau cyntaf a chyfenw), gan gynnwys unrhyw enwau yr oedd yr ymadawedig yn cael ei adnabod wrthynt, a'r enw y cofrestrwyd y farwolaeth dano.
- Cyfeiriad parhaol olaf
- Dyddiad geni
- Dyddiad y farwolaeth neu ystod o ddyddiadau oni wyddoch yr union ddyddiad
- Rhaid i chi hefyd roi eich enw a'ch cyfeiriad
Rhaid i chi ddarparu manylion llawn a chywir am yr ymadawedig i ni. Gwneir y chwiliad drwy wirio'r manylion a roddwyd gennych chi yn erbyn ein cofnodion ni. Os rhoddwch fanylion anghywir, mae'n annhebygol y bydd eich chwiliad yn llwyddiannus.
Gallwch un ai ddanfon y ffurflen yn bersonol neu ei hanfon i mewn ynghyd â'r ffi o £5.00 at un ai:
a) Yr Adran Brofiant
Adran y Ceidwad Cofnodion
Prif Gofrestrfa'r Adran Deulu
First Avenue House
42 -49 High Holborn
Llundain WC1V 6NP
neu b) Unrhyw Gofrestrfa Brofiant neu Is-Gofrestrfa Brofiant
Dylai sieciau/archebion post fod wedi eu gwneud yn daladwy i "HMCS" (Rhaid i sieciau a gyflwynir yn bersonol gael eu cefnogi gan gerdyn gwarantu siec).
Beth sy'n digwydd nesaf?
Byddwch yn derbyn cadarnhad ysgrifenedig fod y chwiliad sefydlog wedi'i drefnu. Bydd y llythyr hwnnw'n rhoi i chi'r cyfeirnod a roddwyd i'ch chwiliad sefydlog, a rhaid ei ddyfynnu ar bob gohebiaeth.
Ar yr amod eich bod wedi rhoi manylion llawn a chywir yr ymadawedig, pe digwydd i grant gael ei roddi cyn i'ch chwiliad sefydlog ddod i ben, anfonir copi i chi drwy'r post.
Beth os nad wyf yn derbyn copi o grant drwy'r post?
Os na fyddwch yn derbyn copi o grant cynrychiolaeth drwy'r post, mae'n golygu na roddwyd grant sy'n cyfateb i'r manylion a ddarparwyd gennych.
Beth ddylwn i ei wneud os gwelaf fy mod wedi rhoi'r manylion anghywir?
Hysbysu'r Gofrestrfa ble y bu i chi drefnu'ch chwiliad sefydlog yn ysgrifenedig cyn gynted â phosibl, gan ddarparu'r manylion cywir ar eu cyfer.
Alla' i adnewyddu fy chwiliad sefydlog?
Gallwch. Gellir adnewyddu'r chwiliad sefydlog yn y mis olaf (h.y. y chweched), e.e. os dechreuodd eich chwiliad sefydlog ar 1 Ionawr byddai'n dod i ben ar 1 Gorffennaf. Felly gellir ei adnewyddu rhwng 2 Mehefin a 30 Mehefin.
Ysgrifennwch lythyr yn gwneud cais i adnewyddu chwiliad sefydlog, gan ddyfynnu rhif y chwiliad sefydlog ac enw'r ymadawedig. Un ai anfonwch y llythyr, neu ewch ag ef yn bersonol i'r Gofrestrfa lle trefnoch chi eich chwiliad sefydlog. Rhaid i chi hefyd amgáu'r ffi adnewyddu o £5.00. Os ydych yn gwneud cais drwy'r post, sicrhewch eich bod yn gadael digon o amser iddo gael ei adnewyddu cyn y dyddiad terfynu.
Os yw'ch chwiliad sefydlog wedi dod i ben, rhaid i chi drefnu chwiliad sefydlog arall.
Beth yw oriau agor y Cofrestrfeydd Profiant?
Gall yr amseroedd agor amrywio, felly argymhellwn eich bod bob amser yn ffonio cyn mynd yno. Os nad oes modd i chi gael y rhif ffôn neu'r cyfeiriad o'ch cyfeirlyfr ffôn lleol, gallwch gael y manylion o Adran y Ceidwad Cofnodion, Prif Gofrestrfa'r Adran Deulu, First Avenue House, 42-49 High Holborn, Llundain WC1V 6NP (Ffôn: 020 7947 6000) Minicom 020 7947 7602. I ddod o hyd i'ch cofrestrfa agosaf, cyfeirier at y Cyfeiriadur Cofrestrfeydd Profiant.
Rwyf eisiau chwiliad cyffredinol yn hytrach na chwiliad sefydlog, beth ddylwn i ei wneud?
Dylech un ai
- fynd yn bersonol i Adran y Ceidwad Cofnodion. Byddwch angen gwybod enw llawn yr ymadawedig, y cyfeiriad parhaol olaf a dyddiad y farwolaeth. Dylech hefyd holi, os yn bosibl, i weld a oedd yr ymadawedig yn cael ei adnabod dan unrhyw enwau eraill, ac a yw'r enw ar y dystysgrif farwolaeth yn wahanol i'r enw llawn. Dylech chwilio am gofnod dan yr enwau hyn hefyd. Gallai hefyd fod o fudd i chi chwilio ystod o ddyddiadau am ddyddiad y farwolaeth, gan mai dyma'r unig ffordd i sicrhau eich bod yn cael y siawns orau o ddod o hyd i'r cofnod yr ydych ei angen. Os deuwch o hyd i gofnod am yr ymadawedig yn ein cofnodion, codir ffi o £5.00 arnoch am gopi o'r ewyllys ac am gopi o'r grant [os gofynnwch am y ddau gyda'i gilydd]
- NEU ysgrifennwch at:
Is-Gofrestrfa Brofiant Caerefrog
Llawr Cyntaf
Siambrau'r Castell
Stryd Clifford
Caerefrog YO1 9RG - Yn eich llythyr dylech ddarparu enw llawn yr ymadawedig, dyddiad geni, cyfeiriad parhaol olaf a dyddiad y farwolaeth. Y ffi am chwiliad (sy'n cynnwys copi o'r grant a/neu'r ewyllys os deuir o hyd i gofnod) yw £5.00, yn daladwy i "HMCS". Os dymunwch i chwiliad gael ei wneud am gyfnod hwy na 4 blynedd, ceir ffi ychwanegol o £3.00 am bob cyfnod o 4 blynedd ar ôl y 4 blynedd gyntaf.
Gweler y sylwadau uchod os gwelwch yn dda ynglyn â darparu'r wybodaeth lawnaf bosibl i alluogi gwneud y chwiliad.