Canllawiau ar gael copïau o gofnodion profiant ac ewyllysiau
Sut ydw i'n darganfod a gymrwyd Grant ai peidio?
Beth os nad oes modd i mi fynd i First Avenue House neu i Gofrestrfa?
Beth os nad oes gen i'r wybodaeth gyflawn?
Beth os na allaf ddod o hyd i gofnod yn y Calendr?
Rwy'n gwybod manylion y Grant a'r ewyllys - sut alla' i gael y copïau a ddymunaf?
Faint o amser mae'n cymryd i gael copïau?
Beth am Gofnodion Profiant cyn 1858?
Grant Cynrychiolaeth yw dogfen a gyhoeddir gan y Llys sy'n galluogi'r person(au) a enwir ynddi i ymdrin ag asedion ac eiddo ['ystâd'] yr ymadawedig. Mae'n caniatáu casglu'r arian sydd mewn banciau, cymdeithasau adeiladu ayb., i eiddo gael ei werthu neu ei drosglwyddo, ac i ddyledion gael eu talu. Ceir tri math o grant cynrychiolaeth:
- Profiant: a ganiateir i'r ysgutorion a enwir yn yr Ewyllys
- Llythyr Gweinyddu [gydag Ewyllys]: a ganiateir i rywun ar wahân i ysgutor pan fo'r ymadawedig wedi gadael Ewyllys ddilys, a
- Llythyrau Gweinyddu: a ganiateir pan nad yw'r ymadawedig wedi gadael Ewyllys.
Mae'r holl ddogfennau hyn yn rhoi'r un awdurdod i weinyddu'r ystâd. Drwy'r canllawiau hyn, defnyddir y gair 'grant' i ddisgrifio pob un o'r tri.
Sut ydw i'n darganfod a gymrwyd Grant ai peidio?
Nid oes unrhyw gyfyngiad amser, erbyn pryd y mae'n rhaid cael Grant. Gellir gweld drwy chwilio'r Calendr Profiant [Mynegai Cenedlaethol] a oes grant wedi'i roi ai peidio. Ceir calendr ar gyfer pob blwyddyn o 1858 i'r presennol. Cyn 1973, yr oedd y calendrau ar ffurf llyfrau, ond ar ôl hynny cofnodwyd hwy ar microfiche. Ers 1998, cedwir y calendr o 1996 ymlaen ar gyfrifiadur. Gwneir cofnod yn y calendr yn y flwyddyn pryd y rhoddwyd grant [nid o angenrheidrwydd y flwyddyn y bu'r ymadawedig farw] ac fe'u trefnir yn nhrefn yr wyddor yn ôl cyfenw'r ymadawedig. Mae'r wybodaeth a roddir yn y calendrau wedi newid ychydig dros y blynyddoedd, ond bydd pob cofnod yn cynnwys y manylion canlynol:
- enw llawn a'r cyfeiriad olaf
- dyddiad marwolaeth
- y math o grant a roddwyd
- y Gofrestrfa lle rhoddwyd y grant, a'r dyddiad cyhoeddi
- gwerth gros yr ystâd
Mae'r calendrau'n cynnwys yr holl grantiau a roddwyd yng Nghymru a Lloegr.
Ni chodir unrhyw dâl arnoch am chwilio'r calendrau eich hun. Os byddwch angen unrhyw help, gall y staff egluro i chi sut i wneud hyn.
Yr unig le lle ceir cyfres gyflawn o galendrau [o 1858] sydd ar gael i'w harchwilio gan y cyhoedd yw First Avenue House yn Llundain. Mae gan y rhan fwyaf o Gofrestrfeydd Profiant Dosbarth galendrau ar gyfer yr hanner can mlynedd diwethaf. Os ydych yn bwriadu ymweld â Chofrestrfa'n benodol ar gyfer edrych ar y cofnodion, argymhellir eich bod yn cysylltu â'r Gofrestrfa ymlaen llaw [ceir rhestr o gyfeiriadau a rhifau ffôn dros y dudalen], i holi beth sydd ar gael.
Beth os nad oes modd i mi fynd i First Avenue House neu i Gofrestrfa?
Fe wnaiff swyddogion y Gofrestrfa gynnal chwiliad ar eich rhan. Codir tâl am hyn, ond os deuir o hyd i grant, bydd y ffi chwilio'n cynnwys darparu copi o'r grant a'r Ewyllys [os oes un].
Rhaid i chi ysgrifennu at yr Adran Chwiliadau a Chopïau drwy'r Post yng Nghaerefrog (Yr Adran Chwiliadau a Chopïau drwy'r Post, Is-Gofrestrfa Brofiant Caerefrog, Llawr Cyntaf, Siambrau'r Castell, Stryd Clifford, Caerefrog YO1 9RG) gan roi enw llawn, cyfeiriad a dyddiad marwolaeth yr ymadawedig, gan ddatgan yr hyn yr ydych ei eisiau ac amgáu'r ffi briodol.
Ni ellir derbyn ceisiadau dros y ffôn.
Beth os nad oes gen i'r wybodaeth gyflawn?
Os ydych yn barod i dreulio amser ar y mater, efallai y bydd modd i chi ddod o hyd i'r hyn yr ydych yn chwilio amdano gydag ychydig iawn o wybodaeth ar wahân i gyfenw'r ymadawedig.
Os gofynnwch i'r Gofrestrfa wneud chwiliad ar eich rhan, fe wnawn ein gorau gyda pha wybodaeth bynnag a roddir gennych, ond heb yr enw llawn cywir o leiaf, ac o ba flwyddyn y dymunwch i'r chwiliad gychwyn, ni fydd modd i ni ganfod y cofnod cywir.
Beth os na allaf ddod o hyd i gofnod yn y Calendr?
Os digwyddodd y farwolaeth amser maith yn ôl [blynyddoedd], mae'n debyg ei fod yn golygu nad oedd angen grant, ac o'r herwydd, ni fydd modd i ni eich cynorthwyo ymhellach. Os oedd y farwolaeth yn fwy diweddar, gallai olygu un ai nad oedd angen grant, neu nad oes grant wedi'i gael hyd yma. Os ydych o'r farn ei bod yn debygol y gwneir grant, gallwch aros am ychydig amser cyn gwneud chwiliad pellach, neu ofyn am 'chwiliad sefydlog' o'r ystâd.
Beth yw Chwiliad Sefydlog?
Mae chwiliad sefydlog yn ddilys am chwe mis, ac os cyhoeddir grant o fewn y cyfnod hwnnw, byddwch yn derbyn copi o'r grant a chopi o'r Ewyllys yn awtomatig.
Mae modd i chi ymestyn chwiliad sefydlog am gyfnodau pellach o chwe mis hyd nes eich bod un ai'n derbyn copi neu'n dod i'r casgliad ei bod yn annhebygol y cymrwyd grant.
Rwy'n gwybod manylion y Grant - sut alla' i gael y copïau a ddymunaf?
Unwaith eich bod yn gwybod pryd a ble y cyhoeddwyd grant, mae modd i chi gael copïau o'r Grant a'r Ewyllys [os oes un]. Cewch archebu copïau yn First Avenue House neu yn unrhyw Gofrestrfa Brofiant Ddosbarth. Dylech nodi enw llawn yr ymadawedig, dyddiad y grant, y Gofrestrfa ble y cyhoeddwyd ef, pa gopïau yr ydych eu heisiau, a thalu'r ffi briodol. Mae modd i chi archebu copïau drwy'r post neu drwy fynd i unrhyw Gofrestrfa. Ni ellir derbyn archebion dros y ffôn.
Faint o amser mae'n cymryd i gael copïau?
Mae'r amser a gymerir i gyflenwi copïau'n amrywio, gan ddibynnu ar ble y cedwir y dogfennau gwreiddiol. Mewn rhai achosion, efallai y bydd modd i ni roi copi i chi 'yn y fan a'r lle', ond yn gyffredinol mae'n rhaid i ni eu harchebu o'r fan lle cedwir y dogfennau gwreiddiol.
Nod y Gwasanaeth Profiant yw cyflenwi copïau o fewn 21 diwrnod gwaith i dderbyn eich cais.
- Os gwnewch y chwiliad eich hun ac archebu copïau wrth y cownter: £5 (mae hyn yn cynnwys copi o'r ewyllys, os oes un) mae copïau ychwanegol o'r un ddogfen yn costio £1 y copi
- Os gwnewch y chwiliad eich hun ac archebu copïau drwy'r post: £5 am bob ystâd: mae'r ffi hon yn cynnwys copi o'r Ewyllys [os oes un], waeth faint o dudalennau sydd iddi, a chopi o'r grant.
- Os ysgrifennwch i Gaerefrog a gofyn am chwiliad: £5 (Mae hyn mewn perthynas â'r cyfnod o 4 blynedd ers dyddiad y farwolaeth). Mae yna ffi chwilio bellach o £3 ar gyfer pob cyfnod dilynol o 4 blynedd a chwilir. Os deuir o hyd i grant, mae'r ffi'n cynnwys copi o'r Ewyllys [os oes un], waeth faint o dudalennau sydd iddi, a chopi o'r grant.
- Os dymunwch ysgrifennu i gael chwiliad a/neu gopi, dylech ysgrifennu at Yr Adran Chwiliadau a Chopïau Drwy'r Post, Is-Gofrestrfa Brofiant Caerefrog, Siambrau'r Castell, Stryd Clifford, Caerefrog, YO1 9RG, lle mae uned arbennig yn ymdrin â cheisiadau o'r fath. Cliciwch yma i ddadlwytho ffurflen gais, neu i weld eu Telerau Gwasanaeth.
- 'Chwiliad Sefydlog' [ac estyniad i 'chwiliad sefydlog']: £5 yn cynnwys copi o'r grant a chopi o'r Ewyllys.
Dylid talu gyda siec neu archeb bost, yn daladwy i Wasanaeth Llysoedd Ei Mawrhydi ("HMCS").
Os ydych yn gwneud cais o'r tu allan i'r DU, dylid talu gydag archeb arian rhyngwladol mewn punnoedd sterling. Os byddwch yn mynd i swyddfa'n bersonol, yna wrth gwrs gallwch dalu mewn arian parod.
Beth am Gofnodion Profiant cyn 1858?
Nid yw'r Gwasanaeth Profiant yn dal unrhyw gofnodion na dogfennau cyn 1858. Os ydych angen gwybodaeth am y rhain, argymhellir i chi gysylltu â:
Y Ganolfan Cofnodion Teuluol,
1 Myddelton Street,
Llundain EC1R 1UW
Rhif ffôn 020 8392 5300
neu archifydd eich awdurdod lleol am gyfarwyddyd.
Gellir archwilio calendrau ac archebu copïau yn unrhyw un o'r swyddfeydd a nodir isod:
Birmingham: The Priory Courts, 33 Bull Street, B4 6DU
Ffôn 0121 681 3400
Brighton: William Street, BN2 2LG
Ffôn 01273 573510
Bryste: The Crescent Centre, Temple Back,BS1 6EP
Ffôn 0117 927 3915
Caerdydd: 2 Heol y Parc, CF10 1TB
Ffôn 029 2037 6467
Ipswich: Llawr Daear, 8 Arcade Street, Ipswich, IP1 1EJ
Ffôn 01473 284 260
Leeds: 3ydd Llawr, Coronet House, Queen Street, LS1 2B4
Ffôn 0113 386 3540
Lerpwl: Queen Elizabeth II Law Courts, Derby Square, L2 1XA
Ffôn 0151 236 8264
Llundain: Y Ceidwad Cofnodion, Prif Gofrestrfa'r Adran Deulu, First Avenue House, 42 - 49 High Holborn, Llundain WC1V 6NP
Ffôn 020 7947 7000
Manceinion: 9fed Llawr, Astley House, Quay Street, M3 4AT
Ffôn 0161 834 4319
Newcastle-Upon-Tyne: 2il Lawr, Plummer House, Croft St, NE1 6NP
Ffôn 0191 261 8383
Rhydychen: Oxford Combined Court Building, St. Aldates, Oxford. OX1 1LY Ffôn 01865 793055
Caerwynt : 4ydd Llawr, Cromwell House, Andover Road, SO23 7EW
Ffôn 01962 897024
Mwy o Wybodaeth
Mae'r cyfarwyddyd hwn yn esbonio'r drefn ar gyfer cael copïau pan fo grantiau wedi'u cyhoeddi yng Nghymru a Lloegr, am wybodaeth ynglyn â grantiau a gyhoeddwyd mewn rhannau eraill o'r DU ac yng Ngweriniaeth Iwerddon dylech gysylltu â'r canlynol:
Yr Alban: H M General Register Office
Hyd at 1985: H M Register Office, H M Register House Princes Street, Caeredin EH1 3YY
Ffôn 0131 535 1352
Ar ôl 1985: H M Commissary Office, 27 Chambers St, Caeredin EH1 1LB
Ffôn 0131 247 2850
Gogledd Iwerddon: Probate & Matrimonial Office, Royal Courts of Justice [Ulster], Chichester Street, Belfast BT1 3JF
Ffôn 028 9023 5111
Gweriniaeth Iwerddon: Probate Office, Four Courts, Dulyn
Ffôn Dulyn 725555
Os ydych angen mwy o wybodaeth cewch gysylltu ag unrhyw Gofrestrfa Brofiant.