Rwyf wedi cael dyfarniad ond dydy'r diffynnydd ddim wedi talu
Tudalen 1 o 8
Mae'r canllawiau hyn ar gael ar ffurf pdf hefyd.
Sut mae cael fy arian ar ôl dyfarniad?
Os ydy'r llys wedi penderfynu bod rhaid i rywun dalu swm o arian i chi (rydych wedi 'cael dyfarniad yn erbyn y diffynnydd'), ond dydych chi heb dderbyn taliad, efallai y bydd y canllawiau hyn yn eich helpu chi i benderfynu beth i'w wneud nesaf.
Wnaiff y llys ddim gorfodi'r dyfarniad oni bai eich bod chi'n gofyn iddo wneud hynny.
Gallwch geisio cael eich arian (a elwir yn 'orfodi eich dyfarniad') drwy ofyn i'r llys am unrhyw un o'r canlynol:
- gwarant i weithredu;
- gorchymyn atafaelu enillion;
- gorchymyn dyled trydydd parti; neu
- orchymyn arwystlo.
Yn y canllawiau hyn, ceir disgrifiadau byr o bob un o'r dulliau gorfodi hyn.
Os yw'r swm sy'n ddyledus i chi'n fwy na £750, fe allwch chi hefyd wneud cais am wneud y diffynnydd yn fethdalwr. Fodd bynnag, gall hyn fod yn ddrud. Gallwch gael gwybodaeth am y drefn methdaliad gan staff llys sirol sy'n ymdrin ag achosion methdalu.
Cofiwch na all y llys warantu y cewch chi'ch arian yn ôl a bydd rhaid i chi dalu ffi am unrhyw gamau a gymerwch. Er y bydd y llys yn ychwanegu'r ffi at yr arian sy'n ddyledus gan y diffynnydd eisoes, all y llys ddim talu nôl i chi yr arian rydych wedi'i dalu os na fyddwch chi'n llwyddo i gael eich arian gan y diffynnydd, neu os bydd y llys yn gwrthod eich cais.
Fodd bynnag, fe allai eich sefyllfa ariannol olygu nad oes rhaid i chi dalu ffi. Mae'r canllawiau Ffioedd Llys - oes rhaid i chi eu talu? yn rhoi rhagor o wybodaeth am hyn. Hefyd, gall staff y llys ddarparu copi o'r canllawiau hyn a'r ffurflen gais i chi. Bydd yn rhaid i chi wneud cais ar wahân ar gyfer pob ffi y buasech fel arall yn gorfod ei thalu.
Cyn i chi benderfynu sut i fwrw ymlaen, dylech ystyried:
- ydych chi'n debygol o gael eich arian a ffi'r llys gan y diffynnydd ai peidio;
- ydy'r diffynnydd mewn dyled i bobl eraill neu oes ganddo/i ddyfarniadau llys sirol eraill yn ei h/erbyn;
- ydy'r diffynnydd yn berchen ar unrhyw nwyddau neu asedau y gellir eu cymryd a'u gwerthu mewn arwerthiant;
- ydy'r diffynnydd yn gweithio;
- oes gan y diffynnydd enillion eraill, megis incwm o fuddsoddiadau;
- oes gan y diffynnydd gyfrif banc, cymdeithas adeiladau neu gyfrif arall;
- ydy'r diffynnydd yn berchen ar eiddo (tŷ); neu
- oes ar rywun arall arian i'r diffynnydd.