Cynadledda Fideo mewn llysoedd

Mae cynadledda fideo yn galluogi unrhyw berson sydd â diddordeb mewn achosion llys i fod yn rhan o wrandawiad o leoliad pell. Ar ei symlaf, gall tyst mewn lleoliad pell roi ei d/thystiolaeth trwy gyfrwng cyswllt fideo â'r llys gydag un sgrin ac un camera yn ystafell y llys. Mae'r dechnoleg sydd ei hangen i sefydlu cyswllt fideo yn gymharol syml. Mae angen sgrin a chamera gyda meicroffon ym mhob lleoliad. Gellir defnyddio unrhyw fath o sgrin. Defnyddir llinell ffôn ISDN a gyflenwir gan BT i drosglwyddo'r lluniau a'r sain yn electronig rhwng y lleoliadau. Cysylltir trwy ddeialu'r rhif ffôn a neilltuir ar gyfer un o'r lleoliadau.

Yn unol â Deddf Mynediad at Gyfiawnder 1999, caniateir defnyddio'r cyfleusterau Cynadledda Fideo mewn gwrandawiadau sifil, e.e. cynadleddau rheolaeth achos, gwrandawiadau llareiddiad ategol, tystion tramor neu dystion mewn lleoliad pell neu mewn unrhyw achos sifil lle bydd y llys yn rhoi cyfarwyddyd i ddefnyddio'r fideo a bod y partïon perthnasol yn rhoi caniatâd i'w ddefnyddio.

Mae offer Cynadledda Fideo yn y lleoliadau canlynol ac mae'n bosibl i bob lleoliad gysylltu ag unrhyw leoliad arall sydd ar y rhestr. Er enghraifft, gellir defnyddio offer Cynadledda Fideo yn Birmingham i roi tystiolaeth mewn achos a glywir yn Plymouth. Gellir cysylltu amryw leoliadau hefyd, e.e. gellir defnyddio'r dystiolaeth a roddir yn Bournemouth, Leeds a Manceinion mewn achos a glywir yn Llysoedd Barn Brenhinol Llundain. Mae'r rhwydwaith yn hyblyg iawn.

Cynadledda Fideo yn awr ar gael mewn Canolfannau Gofal

Er mwyn datrys y broblem o oedi gydag achosion gofal plant a goruchwyliaeth, cynigir technoleg Cynadledda Fideo (CF) mewn Canolfannau Gofal yn awr (mae gan Ganolfannau Gofal awdurdodaeth i wrando Achosion Deddf Plant Cyfraith Gyhoeddus). Nodwyd mai trefnu presenoldeb tystion arbenigol oedd yn un o'r prif achosion dros oedi, a bydd yr offer CF yn rhoi mwy o hyblygrwydd i lysoedd o ran pryd a sut y mae angen tystion arbenigol i roi tystiolaeth (yn enwedig tystion meddygol).

Gosodwyd unedau CF symudol ym mhob un o'r 53 o Ganolfannau Gofal ledled Cymru a Lloegr, ac mae'r Weinyddiaeth Cyfiawnder yn y broses o ddatblygu cyfeirlyfr o safleoedd addas mewn ysbytai, sefydliadau meddygol a phrifysgolion y gellid eu defnyddio gan dystion arbenigol. Golyga hyn y gall GLlEM drefnu dyddiadau gwrandawiadau a chwblhau achosion yn gynt a sicrhau gostyngiad yn y costau a wynebir gan y partïon a'r pwrs cyhoeddus. Bydd hefyd yn golygu y bydd gofyn i arbenigwyr dreulio llai o amser yn teithio'n ôl ac ymlaen o lysoedd a llai o amser yn disgwyl i'w hachos gael ei glywed.

Dylai pobl sy'n dymuno defnyddio'r offer CF gyflwyno eu cais i'r llys cyn y Gynhadledd Rheoli Achos, neu cyn gynted ag sy'n ymarferol bosibl cyn y gwrandawiad llawn. Yn ystod y Gynhadledd Rheoli Achos gellir cytuno ynghylch unrhyw faterion ymarferol angenrheidiol, fel lleoliad y tyst, pwy fydd yn gweinyddu'r llw ac unrhyw drefniadau arbennig eraill sydd eu hangen er mwyn sicrhau y gall y tystion roi eu tystiolaeth yn rhwydd.