Mabwysiadu: Arweiniad i Ddefnyddwyr y Llysoedd
Tudalen 9 o 13
Beth os nad yw rhieni’r plentyn yn caniatáu’r mabwysiadu?
Os nad yw rhieni naturiol y plentyn neu’r gwarcheidwad wedi rhoi caniatâd i’r mabwysiadu, a’ch bod yn gofyn i’r llys hepgor eu caniatâd hwy, bydd angen i’r llys fod yn fodlon:
- nad oes modd cael hyd i’r rhiant neu’r gwarcheidwad neu nid yw ef neu hi yn gallu rhoi eu cytundeb, neu
- fod lles y plentyn yn ei gwneud yn ofynnol i hepgor eu caniatâd hwy.
Rhaid i chi nodi ar eich ffurflen gais pa un o’r amodau hyn sy’n berthnasol. Bydd angen i chi hefyd atodi datganiad byr o’r ffeithiau yr ydych yn dibynnu arnynt i gefnogi eich cais. Gelwir y datganiad hwn yn ‘Ddatganiad Ffeithiau’. Dylai gael ei lofnodi gan eich twrnai neu gennych chi (a’r ceisydd arall) os nad oes gennych dwrnai.
Bydd y llys yn anfon copi o’r Datganiad Ffeithiau i bob un o rieni neu warcheidwaid y plentyn, felly os ydych yn bwriadu gofyn i’r llys gadw pwy ydych yn gyfrinachol, dylech sicrhau nad yw’r datganiad ffeithiau’n cynnwys unrhyw wybodaeth a allai ddatgelu pwy ydych, ble rydych yn byw na ble mae’r plentyn yn mynd i’r ysgol neu’r feithrinfa.