Mabwysiadu: Arweiniad i Ddefnyddwyr y Llysoedd
Tudalen 1 o 13
Mae'r canllawiau hyn ar gael ar ffurf pdf hefyd.
I bwy y mae'r daflen hon?
Bwriedir y daflen hon ar gyfer unrhyw un sy'n meddwl am wneud cais i lys am orchymyn mabwysiadu dan Ddeddf Mabwysiadu a Phlant 2002 (a ddaeth i rym ar 30 Rhagfyr 2005). Y mae hefyd i'w defnyddio gan weithwyr proffesiynol ym meysydd materion cyfreithiol a gofal plant sy'n gysylltiedig â'r broses fabwysiadu.
Mae'r daflen yn rhoi gwybodaeth gyffredinol ynghylch pwy gaiff fabwysiadu plentyn, pa wybodaeth fydd y llys ei hangen, a sut bydd y llys yn ymdrin â'ch cais. Fe'i bwriedir fel canllaw yn unig. Nid yw'n rhoi cyngor i chi ynglŷn â phenderfynu a ydych am fabwysiadu plentyn ai peidio ac nid yw'n ddatganiad cyflawn o'r gyfraith, ac nid yw chwaith yn ymdrin â'r holl benderfyniadau ynghylch mabwysiadu y gall y llysoedd eu gwneud dan Ddeddf Mabwysiadu a Phlant 2002.
Nid yw'r daflen hon yn ymdrin â mabwysiadu plant o wledydd tramor. Os ydych yn meddwl mabwysiadu plentyn y mae ei gartref parhaol y tu allan i'r Deyrnas Unedig, Ynysoedd y Sianel neu Ynys Manaw gellir cael cyngor gan:
- eich awdurdod lleol
- asiantaeth fabwysiadu gymeradwy
- twrnai
- canolfan gyfraith neu ganolfan cyngor cyfreithiol
- Canolfan Cyngor ar Bopeth
- neu wefan yr Adran Addysg a Sgiliau
Mae taflen A21 Mabwysiadu Rhyngwladol – cyfarwyddyd, hefyd yn rhoi mwy o wybodaeth am fabwysiadu plentyn o wlad dramor.